ප්‍රාදේශීය ලේකම් කාර්යාලය - කාතන්කුඩි

2025ஆம் ஆண்டில் ஜனாதிபதி நிதியத்தின் செயற்பாடுகளை பிரதேச மட்டங்களில் விரிவுபடுத்தி, சேவைகளை மக்களுக்கு சிறப்பாகவும் வினைத்திறனுடனும் வழங்கியமைக்காக மட்டக்களப்பு மாவட்டத்தில் காத்தான்குடி பிரதேச செயலகம் முதலிடத்தினை பெற்றுள்ளது.

இதனை கௌரவிக்கும் வகையில் ஏற்பாடு செய்யப்பட்ட விருது வழங்கும் நிகழ்வு 2026 செப்டெம்பர் 12ஆம் திகதி மட்டக்களப்பு சுவாமி விபுலானந்த அழகியல் கற்கைகள் நிறுவகத்தில் (SVIAS) நடைபெற்றது.
இந்நிகழ்வில் பிரதமர் கலாநிதி. ஹரிணி அமரசூரிய அவர்களினால் காத்தான்குடி பிரதேச செயலகத்திற்கு வழங்கப்பட்ட விருதினை, காத்தான்குடி பிரதேச செயலாளர் திருமதி. நிஹாரா மௌஜூத் மற்றும் சமூக சேவை உத்தியோகத்தர் எஸ்.ஏ.சீ. நஜிமுதீன் ஆகியோர் இணைந்து பெற்றுக்கொண்டனர்.
ஜனாதிபதி நிதியத்தின் கீழ் வழங்கப்படும் சேவைகள் மற்றும் உதவிகளை மக்கள் மட்டத்தில் சிறப்பாக நடைமுறைப்படுத்தி, தேவையுடைய மக்களை அடையாளம் கண்டு அவர்களுக்கு உரிய சேவைகளை துரிதமாகவும் வினைத்திறனுடனும் பெற்றுக்கொடுப்பதில் காத்தான்குடி பிரதேச செயலகம் மேற்கொண்ட அர்ப்பணிப்பான செயற்பாடுகளுக்கான அங்கீகாரமாக இவ்விருது வழங்கப்பட்டுள்ளது.
இச்சாதனை, காத்தான்குடி பிரதேச செயலாளர் திருமதி. நிஹாரா மௌஜூத் அவர்களின் வழிகாட்டல் மற்றும் நிர்வாகத் திறனுக்கும், உதவிப் பிரதேச செயலாளர் திருமதி. சில்மியா உள்ளிட்ட நிர்வாகக் குழுவினரின் மேற்பார்வைக்கும், சமூக சேவை உத்தியோகத்தர் திரு. நஜிமுதீன் மற்றும் விடய உத்தியோகத்தர் திருமதி. பஸ்லினா நுசைர் ஆகியோரின் அர்ப்பணிப்பான பணிக்கும், பிரதேச செயலகத்தின் ஒட்டுமொத்த உத்தியோகத்தர்களினதும் குழு முயற்சிக்கும் கிடைத்துள்ள முக்கியமான அங்கீகாரமாகும்.
மக்களுக்கான மனிதநேயமான சேவைகளை தொடர்ந்தும் சிறப்பாக வழங்குவதற்கான ஊக்கத்தை வழங்கும் இவ்வெற்றி, காத்தான்குடி பிரதேச செயலகத்திற்கும் காத்தான்குடி மக்களுக்கும் பெருமை சேர்க்கும் சாதனையாக அமைந்துள்ளது.
இச்சாதனையைப் பெற்றுக்கொள்வதற்கு அர்ப்பணிப்புடன் பணியாற்றிய காத்தான்குடி பிரதேச செயலகத்தின் அனைத்து உத்தியோகத்தர்கள் மற்றும் பணிக்குழாமினருக்கும் நெஞ்சார்ந்த வாழ்த்துக்களும் பாராட்டுக்களும் தெரிவிக்கப்படுகின்றன.

காத்தான்குடி பிரதேச செயலகத்தில் 2026 ஆகஸ்ட் 07ஆம் திகதி, பிரதேச செயலாளர் திருமதி நிஹாரா மெளஜுத் அவர்களின் தலைமையில் அதிகாரசபைக் கூட்டம் நடைபெற்றது.

இக்கூட்டத்தில் பிரதேச அதிகாரசபையின் செயலாளர், கலாசார உத்தியோகத்தர்கள்மற்றும் அதிகாரசபை உறுப்பினர்கள் கலந்துகொண்டனர்.

கூட்டத்தின் போது பிரதேச மட்டத்தில் முன்னெடுக்கப்படும் கலை, கலாசார மற்றும் சமூக நடவடிக்கைகள் தொடர்பிலும், அவற்றை மேலும் சிறப்பாக நடைமுறைப்படுத்துவதற்கான வழிமுறைகள் தொடர்பிலும் கலந்துரையாடப்பட்டன.

மேலும், பிரதேசத்தின் கலை மற்றும் கலாசாரத் துறையின் முன்னேற்றத்திற்காக மேற்கொள்ள வேண்டிய எதிர்கால நடவடிக்கைகள், நிகழ்ச்சித் திட்டங்கள் மற்றும் அவற்றை வெற்றிகரமாக முன்னெடுப்பதற்கான ஒருங்கிணைப்பு நடவடிக்கைகள் தொடர்பிலும் கருத்துக்கள் பரிமாறப்பட்டன.

அதிகாரசபையின் செயற்பாடுகளை வலுப்படுத்துவதுடன், பிரதேசத்தின் கலை, கலாசார பாரம்பரியங்களைப் பாதுகாத்து அவற்றை எதிர்கால சந்ததியினருக்கு கொண்டு செல்வதற்கான நடவடிக்கைகளை தொடர்ச்சியாக முன்னெடுப்பதன் அவசியமும் இதன்போது வலியுறுத்தப்பட்டது.

ஜனாதிபதி செயலகத்தின் பணிப்புரைக்கமைவாக அரசாங்கத்தினால் முன்னெடுக்கப்படும் “அத்தம” தேசிய வேலைத்திட்டத்தின் ஓர் அங்கமாகவும், “கிளீன் ஸ்ரீலங்கா” வேலைத்திட்டத்தின் கீழ் “ஒற்றுமையாக ஒன்றிணைவோம் – தூய்மையான இலங்கையைக் கட்டியெழுப்புவோம்” எனும் தொனிப்பொருளின் அடிப்படையிலும் காத்தான்குடி பிரதேச செயலகப் பிரிவில் தேசிய தூய்மை வேலைத்திட்டம் முன்னெடுக்கப்பட்டது.

இதன் ஆரம்ப நிகழ்வு புதிய காத்தான்குடி வடக்கு 167A கிராம உத்தியோகத்தர் பிரிவிலுள்ள கடற்கரைப் பகுதியில், காத்தான்குடி பிரதேச செயலாளர் திருமதி. நிஹாரா மெளஜூத் அவர்களின் தலைமையில் இடம்பெற்றது.

இத்தூய்மை வேலைத்திட்டத்தின் போது கடற்கரை மற்றும் அதனைச் சூழவுள்ள பகுதிகள் சுத்தம் செய்யப்பட்டதுடன், கால்வாய் ஓரங்களில் காணப்பட்ட கழிவுப் பொருட்கள் அகற்றப்பட்டு துப்புரவு பணிகள் மேற்கொள்ளப்பட்டன. மேலும், வீதி ஓரங்களில் அடர்ந்து காணப்பட்ட புற்கள் வெட்டி அகற்றப்பட்டு, சுற்றுச்சூழல் தூய்மைப்படுத்தப்பட்டது.

இந்நிகழ்வில் கிழக்கு மாகாண பயணிகள் போக்குவரத்து அதிகார சபையின் தலைவர் மற்றும் காத்தான்குடி “கிளீன் ஸ்ரீலங்கா” வேலைத்திட்டத்தின் இணைப்பாளருமான எம்.பி.எம். பிர்தெளஸ் நழீமி, காத்தான்குடி பிரதேச செயலகத்தின் பிரதித் திட்டமிடல் பணிப்பாளர், சமுர்த்தி முகாமையாளர்கள், அபிவிருத்தி உத்தியோகத்தர்கள், சமுர்த்தி அபிவிருத்தி உத்தியோகத்தர்கள், கிராம அபிவிருத்திச் சங்கத் தலைவர்கள், ஜனாஸா நலன்புரி அமைப்பினர், இலங்கை விமானப்படை அதிகாரிகள், பொலிஸ் அதிகாரிகள், சுகாதாரப் பரிசோதகர்கள், பிரஜா சக்தி தவிசாளர்கள் மற்றும் உறுப்பினர்கள், பெண்கள் கிராம அபிவிருத்திச் சங்க உறுப்பினர்கள் உள்ளிட்ட பலரும் கலந்துகொண்டனர்.

இதேவேளை, காத்தான்குடி பிரதேச செயலாளர் பிரிவிலுள்ள 18 கிராம உத்தியோகத்தர் பிரிவுகளிலும் இத்தேசிய தூய்மை வேலைத்திட்டம் ஒரே நாளில் முன்னெடுக்கப்பட்டது. குறித்த கிராம உத்தியோகத்தர் பிரிவுகளில் சமூக வலுவூட்டல் உத்தியோகத்தர்கள், அரச உத்தியோகத்தர்கள், சமூக அமைப்புகளின் பிரதிநிதிகள் மற்றும் பொதுமக்களின் பங்களிப்புடன் பல்வேறு தூய்மை மற்றும் சுற்றுச்சூழல் பாதுகாப்பு நடவடிக்கைகள் மேற்கொள்ளப்பட்டன.

கால்வாய்கள், வீதி ஓரங்கள், பொது இடங்கள் மற்றும் மக்கள் அதிகளவில் பயன்படுத்தும் பகுதிகளை சுத்தப்படுத்துதல், குப்பைக் கழிவுகளை அகற்றுதல், அடர்ந்து காணப்படும் புற்கள் மற்றும் புதர்களை அகற்றுதல் போன்ற பணிகள் இதன்போது முன்னெடுக்கப்பட்டன.

தூய்மையான சுற்றுச்சூழலை உருவாக்குவதும், பொதுமக்களிடையே சுற்றுச்சூழல் பாதுகாப்பு மற்றும் பொது இடங்களைப் பேணிப் பாதுகாப்பது தொடர்பான விழிப்புணர்வை ஏற்படுத்துவதும் இத்திட்டத்தின் முக்கிய நோக்கமாகும். அரச நிறுவனங்கள், பாதுகாப்புத் துறையினர், சமூக அமைப்புகள் மற்றும் பொதுமக்கள் ஒன்றிணைந்து இவ்வாறான செயற்பாடுகளில் ஈடுபடுவதன் மூலம் தூய்மையானதும் அழகானதுமான காத்தான்குடியை உருவாக்க முடியும் என இதன்போது வலியுறுத்தப்பட்டது.